СТРАСТ
Страста е страдање
Похота на умот
Кој ги пали, пеплосува
Пеперутките во стомакот
***
Страста е стражар
Застанат на полпат
Меѓу мене и љубовта
Со меч во раката
Го обезглавува моралот
***
Страста е искушение
Лебедова песна за спокојот
Што ми ја заслепува душата
За да талка без виделина
Низ кафезот на срцето
***
Страста е грев
Стаклена чаша на постоењето
А јас сум пијаница
Што ќе ги исцеди твоите сокови
Што ќе ги испие твоите течности
За да се отрујам среде ноќта
Пред да стигне муграта на покајувањето
Автор: Александар Русјаков
Александар Русјаков е роден 1977 година во Велес.
Објавил збрка раскази “Ме сакаш ли под дождот“ (2010) и двата романи “Тринаесеттиот месец“ (2012) и “Атена со пенис“ (2014).
Негова прва збирка поезија е “Голтка восхит од солзите на вечноста“ (2016).